يوميات (هبله وماسكه طبله)

من طرف **القلب الوفي** الإثنين مايو 03, 2010 8:02 am

موضوع أعجبني وأحببت نقله لكم ،عسى تستمتعوا بفقراته

سايق علينا الهبل ومافيش مرور شافك
جم حمّلوك الهبل وطلـّعوا اسلافك
ادّينى عقلك يا امّا تاخد عقلى ياتهبّل
ياتسيبنى اطبّل وانطّ اركب على كتافك

من طرف **القلب الوفي** الإثنين مايو 03, 2010 2:57 pm

سايق علينا الهبل فواتير تولع نار

وامّا اشتكينا على الخط اتعمل له حصار

والارضى أصبح جريمه والفاعل مجهول

طيّرتوا منّا العقول والدفع بالدولار

من طرف **القلب الوفي** الإثنين مايو 03, 2010 3:04 pm

فى كشك كارته جابوك ماسك معاك دفتر

وكل من فات عليك يلقاك عايز تفتر

سايق علينا الهبل مابتدّيناش اوراق

واخد لنفسك رصيد المازده والفاستر

من طرف **القلب الوفي** الإثنين مايو 03, 2010 3:08 pm

فودافون حبيب قلبنا قول لى جرالك ايه؟

سايق علينا الهبل واللا الجنون واللا ايه

أول مكالمه أسمعك وعلى الدوام عفوا

وكل ماضرب تقول خد لك تلاته جنيه

من طرف **القلب الوفي** الإثنين مايو 03, 2010 3:15 pm

بصّيت على البرلمان وانا لسّه مهبوله
وكل ناسك تمام والدايره معقوله
كان كلّ خوفى عليك من دوشة الطبله
أوتصحى فجأة تلاقى البدله مبلوله

من طرف **القلب الوفي** الإثنين مايو 03, 2010 3:20 pm

ياحلو بانده عليك مش راضى تسمعنى
مش قادر ازنق عليك رجلى بتوجعنى
انا كلّ خوفى ساعة صاحبك مايندهلك
وتقلّ أصلك تروح جارى موقـّعنى

من طرف **القلب الوفي** الإثنين مايو 03, 2010 3:25 pm

الدنيا حالها كده وادى حال مساكيبها

سايقين عليها الهبل ياويل مساكينها

القوّه فيها افترت لمّا الضعيفه انهرت

وأمّا الدبيحة اشتكت كترت سكاكينها

من طرف **القلب الوفي** الإثنين مايو 03, 2010 3:29 pm

ساقوا علينا الهيل وتكتكوه اعلان

تكتك حياتنا خلاص وماعدش فيها أمان

خليتوا فبراير تاريخ عدّا من التلاتين

شئ مستحيل يابلد كلـّك هبل وجنان

من طرف **القلب الوفي** الإثنين مايو 03, 2010 3:34 pm

ح سأل سؤالى والحم حنكى بالقزّير
واكسّر الطبله وأربط ايدى فى الجنازير
عدمتوا ليه الفراخ ساعة ماجاكوا اشتباه
ووقفتوا ليه انتباه على عشـّة الخنازير؟

من طرف **القلب الوفي** الإثنين مايو 03, 2010 3:38 pm

حدّ يساعدنى مع الطبله يقول مواويل

ساعة ماييجى الجنون امضى له على توكيل

يصحى ضمير الهبل لو صادفه طول يومه

يمسك هدومه بحرارة يشقهم للديل

من طرف **القلب الوفي** الإثنين مايو 03, 2010 3:41 pm

لو مات وزير العمل نعمل حداد شهرين
وعطلانين كلنا وعايشين كمان بالدين
الطبله دابت خلاص ساعة امامنا ما مات
والدّفنه جت من سكات ولاحدّ قال آيتين

من طرف **القلب الوفي** الإثنين مايو 03, 2010 3:43 pm

قالوا العلف فيه تلف طبّلت ع الماشى
ماليان تسمّم وجيب السبع ما يخلاشي
شاكيتله سعر اللحوم قال لى الغلط عندك
جاىّ ف زمان الفساد وتربّى فى مواشى

من طرف **القلب الوفي** الإثنين مايو 03, 2010 3:47 pm

فى الحرّ فايته عليك والمنجه موجوده

عطشانه حظىّ اتعدل والطبله مشدوده

عرفت أصلك وعيلتك فى السطور بانت

ونفسى عامت وباتت شهر مسدوده

من طرف **القلب الوفي** الإثنين مايو 03, 2010 3:52 pm

ياعم ارحم بقى شكـّكتنى ف عقلى
مش كلّ مانده عليك دايما بتحلقلى
أعوز أشوفك فى عزّ الضلمه بتغمّض
وأتخبّى منك فى عزّ النور تبحلقلى

من طرف **القلب الوفي** الإثنين مايو 03, 2010 3:55 pm

مسكين أنا وطبلتى مسنود على القضبان

جرّبت اقول غنوتى صوتها طلع غضبان

مخنوق فى زحمة بشر مين بسّ يسمعنى

ماقدرش أغنىّ الهبل والمستمع قرفان

من طرف **القلب الوفي** الإثنين مايو 03, 2010 3:57 pm

ياحلو شكلك كده معقول وكيّفنى
دايما ألاقى البشر شكله مقريفنى
لو كنت تعرف تطبّل تيجى ويّايا
تلطم معايا داهبل الناس معنفنى

من طرف **القلب الوفي** الإثنين مايو 03, 2010 3:59 pm

داخل لحصّة تاريخ بدّلتها بعلوم
والطبله صوتها انكتم والحصّة خلصت نوم
حلال عليكم ضياع البنت ويّا الولد
خلـّيتوا نص البلد بيصيعوا بالدبلوم

من طرف **القلب الوفي** الإثنين مايو 03, 2010 4:02 pm

ساعات أصفـّر واجمّع شلـّة المهابيل
نعمل مسابقة هبل وانغنـّوا طول الليل
واحد يهبّل وفرقة جنبه بتطبّل
وناس تكمّل عدد بالخبط ع الشخاليل

من طرف **القلب الوفي** الإثنين مايو 03, 2010 4:05 pm

انا كنت هبلة وفاكرة البرلمان قمّة
خلا صة أهل البلد فى نزاهة الزمّه
اتاريه يحصّن ويحمى المفسدين منىّ
خلّاني أطبّل واقول يحيا صوت الأمّه

من طرف **القلب الوفي** الإثنين مايو 03, 2010 4:07 pm

نفسى أطبّل شويّه بس قبل ماموت
وانصب كمين للهبل قبل العبط مايفوت
واليافطة عاليه تبيّن سكة الهبله
واشوف لى طبله وانطّ اركب على الكبّوت

من طرف **القلب الوفي** الإثنين مايو 03, 2010 4:12 pm

عايزين نشمّوا النسيم وعقولنا موزونه
مانكتـّروش م الفسيخ وانا لسّه مجنونه
احسن أطبّل وانا بابلع سمك بلطى
واحبس وراهم بحله ملح وليمونه

من طرف **القلب الوفي** الإثنين مايو 03, 2010 4:16 pm

انا عايزه طبله كمان غير اللىّ ويّايه
وواحده هبله تطبّل للضحى معايه
وتكون صبية عفيّه وبنت ناس مجانين
لو زدت عن غنوتين تلطخنى فى قفايه

من طرف **القلب الوفي** الإثنين مايو 03, 2010 4:18 pm

عنيّه شايفه بصحيح واللا امور سيكا
صعبان عليكى العراق ياختى يا امريكا
سيبونى اضحك وابكى واجرى واهبّل
وابات اطبّل واقول دقىّ يامزّيكا

من طرف **القلب الوفي** الإثنين مايو 03, 2010 4:20 pm

انا عايزه ديك أركبه وأكمّل المشوار
كفايا سعر اللحوم على بختى ولـّع نار
أسمع أدانه مع الطبله يسلينى
وأمّا يعادينى أريّش واشتغل جزّار

من طرف **القلب الوفي** الإثنين مايو 03, 2010 4:23 pm

الموضه عملت تحدّى وكل يوم حركات
خلّتني اطبّل لوحدى وامشى اقول حكايات
جابت شباشب ماحبّش مشيى ويّاهم
والضرب بيهم ياخدنى لمحكمة جنايات

يوميات (هبله وماسكه طبله)

يوميات (هبله وماسكه طبله)

رد: يوميات (هبله وماسكه طبله)

رد: يوميات (هبله وماسكه طبله)

رد: يوميات (هبله وماسكه طبله)

رد: يوميات (هبله وماسكه طبله)

رد: يوميات (هبله وماسكه طبله)

رد: يوميات (هبله وماسكه طبله)

رد: يوميات (هبله وماسكه طبله)

رد: يوميات (هبله وماسكه طبله)

رد: يوميات (هبله وماسكه طبله)

رد: يوميات (هبله وماسكه طبله)

رد: يوميات (هبله وماسكه طبله)

رد: يوميات (هبله وماسكه طبله)

رد: يوميات (هبله وماسكه طبله)

رد: يوميات (هبله وماسكه طبله)

رد: يوميات (هبله وماسكه طبله)

رد: يوميات (هبله وماسكه طبله)

رد: يوميات (هبله وماسكه طبله)

رد: يوميات (هبله وماسكه طبله)

رد: يوميات (هبله وماسكه طبله)

رد: يوميات (هبله وماسكه طبله)

رد: يوميات (هبله وماسكه طبله)

رد: يوميات (هبله وماسكه طبله)

رد: يوميات (هبله وماسكه طبله)

رد: يوميات (هبله وماسكه طبله)